Mentalita 1907

 

 

الحاله اللى بيمر بيها جمهور الاهلى حاليا اسوء من المتوقع من سنه و4 شهور كان لينا بوست كنا بنحذر فيه من "زملكه" النادى وجمهوره وفيه جمله كنت قصادها حرفيا يمكن الناس اللى قرت البوست ده خدت بالها منه "هيجى يوم مش هنعرف نكسب فيه فرق بالنسبالنا صفر على الشمال .. وبكره المنتسبين لجمهور الاهلى يفرحوا بالتعادل فى سبيل تجميل صوره معشوقهم" .. الجمله دى فى محلها وده اللى حذرنا منه واهوه حصل طبعا مفيش فخر ولا فرح ولا نيله بالعكس يوم عن يوم كنا بنتمنا نظريتنا تفشل وتحصل معجزه ما .. لكن للاسف كل اللى اتوقعناه حصل ..

طيب هو ايه اللى حصل للاهلى .. بوست تاريخى برده افتكروه للزمن ..

اللى حصل ببساطه هو هدم كامل ومنظم لتركيب معقد اسمه "كيان النادى الاهلى" واللى هدمه كان زكى قرر يضربه من القمه والمتمثله فى "الجمهور" وبعدها انتقل لمرحله تانيه اسمها المبادئ والقيم اللى من دونها النادى للاسف ميفرقش عن الابيض فى شيئ وبعدها تواصل الهجوم للمرحله التالته وهو التهكم على رموز النادى وعلى ادارته وعلى روح الفانله الحمرا وده طبعا ادى الى ان الجمهور ينتزع الثقه من مجلس الاداره الفاشل اللى راقب سقوط النادى مرحله مرحله واكتفى بالتهليل فحسب وسحب الثقه من الفريق وافراده

والصراحه السوشيال ميديا ساعدت فى الانهيار ده بشكل لا يصدق .. فانتشار بيدجات للاعبين معينين وتمجيدهم بشكل يتخطى الحدود البشريه وكأن النادى او حتى مصر او الكوكب كله متوقف عليه ادى لظهور ظاهره الزملكه بشكل واضح فى الجمهور وانتشارها بين الشباب وتحديدا المحدث اللى مشافش فى حياته غير انتصارات النادى وبس .

بدأ الشباب دول يتخلق فى عقليتهم البريئه -افتراضا- ان اللاعب ده يستثنى تماما من العقاب وانه فوق قوانين النادى وان روح الفريق متمثله فيه وبالتالى ظهرلنا المسوخ الفكرى لعقليه جمهور النادى الابيض اللى هى ظاهره فريق "المعلمين" اللى هو السبب الرئيسى فى تدحدر النادى الابيض بشكل كبير جدا وفقدانه لعشرات البطولات .. وده بسبب تمجيد جمهور الزمالك للعيبه معينه بشكل لا يصدق ده خلق منهم وحوش كاسره ميقدرش حد فى النادى او برا النادى يقولهم بم .. بقوا يعملوا اللى عايزينه وميعملوش اللى مش جاى على مزاجهم فكل قوانين الابيض انحنت تحت رجليهم وساعدهم فى كده جمهورهم و سبحان الله تلاقى العقليه دى فيهم لحد دلوقتى بتتوارثها الاجيال فدايما تلاقيه بيكلمك عن فلان الفلانى اللى بيلعب فى خط النص وترقيصاته ومهراته وبلا بلا

اكيد كتير منا شاف الموضوع ده بدأ ينتشر فى جمهور الاهلى الفتره الاخيره للاسف ..

من هنا بيتم الزملكه ولاقدر الله توقعوا كوارث قادمه اكتر واكتر واكتر مش بس فى كره القدم ... افتكروا الكلام ده كويس وخدوه سكرين شوت